يونيورسٽيون شاگردن کي معياري تعليم فراهم ڪن ڇو ته اها ملڪ جي ترقي جي اولين ضرورت آهي: صدر ڊاڪٽر عارف علوي

اسلام آباد – 12 – آڪٽوبر (اي پي پي) صدر ڊاڪٽر عارف علوي ملڪي يونيورسٽين تي زور ڏنو آهي ته اهي شاگردن کي معياري تعليم فراهم ڪن ڇو ته اها ملڪ جي ترقي جي اولين ضرورت آهي، تعليم واري وزارت ۽ هايئر ايجوڪيشن ڪميشن مارڪيٽ ۾ نوڪرين جي گهرج موجب ڪورسز ۽ شعبن کي ڊيزائن ڪرڻ ۾ يونيورسٽين جي مدد ڪن. هو قائداعظم يونيورسٽي جي ڪانووڪيشن جي تقريب کي خطاب ڪري رهيو هو. صدر ڊاڪٽر عارف علوي چيو ته پاڪستان مشڪل معاشي صورتحال مان گذري رهيو آهي پر اميد آهي ته معياري تعليم، قانون جي حڪمراني ۽ انصاف کي يقيني بڻائي جلد ٻيهر عروج حاصل ڪندو. پاڪستان ترقي ڪرڻ جي ڀرپور صلاحيت رکي ٿو ۽ جلد ئي ملڪ ۾ ترقي ۽ خوشحالي جو سج اڀرندو. تقريب دوران صدر يونيورسٽي جي مختلف شعبن ۾ ٽاپ پوزيشن هولڊرز کي ميڊلز ۽ ڪامياب شاگردن کي ڊگريون ڏنيون. ملڪ ۾ طبي شعبي ۾ پيشيور ماڻهن جي کوٽ جو ذڪر ڪندي صدر چيو ته عورت پيشيور ماڻهن کي پنهنجي ڊگري مڪمل ڪرڻ کانپوءِ معاشري ۾ پنهنجو ڪردار ادا ڪرڻ گهرجي. هن چيو ته ملڪ جون عورتون تمام گهڻيون محنتي آهن ۽ اهي مردن سان گڏ ڪلهو ڪلهي ۾ ملائي ملڪ جي ترقي ۾ اهم ڪردار ادا ڪري سگهن ٿيون. هن عورتن کي ڪم وارين جاين تي هراسمينٽ کان پاڪ ماحول فراهم ڪرڻ جي ضرورت تي زور ڏنو ته جيئن اهي آزاداڻي طور تي ڪم ڪري سگهن. صدر چيو ته هن وقت 24 ملين کان وڌيڪ ٻار اسڪولن کان ٻاهر آهن. حڪومت کي انهن ٻارن کي تعليم ڏيڻ جي لاءِ اٽڪل 55000 وڌيڪ اسڪولن جي ضرورت پوندي پر اسان کي انهن ٻارن کي تعليم ڏيڻ جي لاءِ هر ممڪن ڪوشش ڪرڻ گهرجي. علائقائي انگن اکرن جي ڀيٽ ڪندي صدر روشني وڌي ته ڀارت، بنگلاديش ۽ سريلنڪا ۾ اٽڪل 98 سيڪڙو ٻار اسڪولن ۾ داخل آهن. هن چيو ته مسجدن کي جديد ٽيڪنالاجي جي استعمال کانسواءِ تعليم فراهم ڪرڻ جي لاءِ پڻ استعمال ڪري سگهجي ٿو. صدر ڊاڪٽر عارف علوي يونيورسٽين کي چيو ته اهي شاگردن جي لاءِ 2 سالا ايسوسيئيٽ ڊگري پروگرام شروع ڪن ڇو ته مارڪيٽ کي هنرمند پيشيور ماڻهن جي ضرورت آهي. هن چيو ته ڊگري حاصل ڪرڻ کانپوءِ شاگردن کي علم حاصل ڪرڻ بند نه ڪرڻ گهرجي پر زندگي جي هر قدم تي علم حاصل ڪرڻ جو جذبو ظاهر ڪرڻ گهرجي. هن پنهنجي عملي زندگي ۾ قانون جي حڪمراني، انصاف ۽ اخلاقيات کي يقيني بڻائڻ تي پڻ زور ڏنو. ان موقعي تي وفاقي تعليم واري نگران وفاقي وزير مدد علي سنڌي چيو ته حڪومت تعليم کي هر سطح تي فروغ ڏئي رهي آهي. هن چيو ته هن اسلام آباد جي اسڪولن کي سموريون بنيادي سهولتون فراهم ڪرڻ جي هدايت ڪئي آهي ڇو ته بنيادي سهولتن کانسواءِ تعليم جو معيار بهتر نه ٿو ٿي سگهي.

مضمون کا ماخذ : کنگ کانگ روش

متعلقہ مضامین