پنجاب حکومت امدادی پیکیج ودھا ݙتے، چھل اچ جاں بحق تھیوݨ آلے ہر بندے دے وارثیں کوں ݙاہ لکھ روپے ݙتے ویسن

لاہور۔24اگست (اے پی پی) صوبائی وزیر پارلیمانی امور محمد بشارت راجہ دی صدارت وزارتی ڈیزاسٹر مینجمنٹ کمیٹی دے پہلے اجلاس اچ چھل توں متاثرہ لوکاں کیتے امدادی پیکیج اچ ودھارے دا فیصلہ کیتا ڳئے۔ صوبائی وزرا سردار محسن لغاری، نوابزادہ منصور علی خان، علی افضل ساہی، چیف سیکرٹری کامران علی افضل،ایڈیشنل آئی جی ذوالفقار حمید اتے ٻئے افسر اجلاس اچ شریک تھیے۔ ایں موق عتے چھل متاثرہ علاقیاں دی صورتحال اتے ریسکیو اتے ریلیف آپریشن دا جائزہ ڳھدا ڳیا۔ سنیئر ممبر بورڈ آف ریونیو زاہد اختر زمان اتے ڈائریکٹر جنرل پی ڈی ایم اے فیصل فرید متاثرہ علاقیاں اچ ریسکیو آپریشن تے بریفنگ ݙتی۔ حکومت ولوں چھل اچ جاں بحق تھیوݨ آلے ہر بندے دے وارثیں کوں ݙاہ لکھ روپے ݙتے ویسن پہلے اے رقم اٹھ لکھ روپے ہئی۔ وزارتی ڈیزاسٹر مینجمنٹ کمیٹی انتہائی زخمی شہری کوں 3 لاکھ، شدید زخمی کوں ہک لکھ روپے ݙیوݨ دی وی منظوری ݙتی۔ وزارتی کمیٹی مکانات دے ضیان دے امدادی پیکیج تے وی نظر ثانی کیتی۔ مکمل پکا مکان تباہ تھیوݨ تے حکومت چار لکھ روپے ݙیسی جزوی پکے مکان دے ضیان تے امدادی رقم 40 ہزار توں ودھا تے ݙو لکھ روپے کر ݙتی ڳئی اے اتے مکمل کچے اتے جزوے کچے مکان دے ضیان تے ݙو لکھ روپے اتے پنڄاہ ہزار روپے ملسن۔ محمد بشارت راجہ عزم کیتا جو امدادی پیکیج دے تحت متاثرین کوں فوری ادائیگی کیتی ویسی۔ اجلاس چھل اچ مال مویشی دے ضیان دے ازالے دا وی جائزہ ڳھدا اتے فیصلہ کیتا ڳیا جو وݙے مال دی ہلاکت تے 50 ہزار روپے، ٻھیݙ ٻکری دی ہلاکت تے پںج ہزار روپے ݙتے ویسن۔ وزیر پارلیمانی امور محمد بشارت راجہ آکھیا جو حکومت چھل اچ فصلاں دے نقصان تے ساݙھے 12 ایکڑ تئیں فی ایکڑ 15 ہزار روپے دی امداد وی ݙیسی۔

مضمون کا ماخذ : ہرکیولس اور پیگاسس

متعلقہ مضامین